Agrohomeopatia
SERVIZOS
SERVIZO AGROHOMEOPÁTICO
Investigación e aplicación de preparados para a protección natural dos cultivos
A Fundación Galicia Verde investiga a utilización da agrohomeopatía como alternativa para a prevención e o control das enfermidades das plantas, dentro dun modelo de agricultura rexenerativa e respectuosa cos procesos naturais.
O noso traballo baséase na elaboración de preparados agrohomeopáticos denominados nosodes, obtidos a partir de material relacionado coa enfermidade que se pretende controlar.
Partimos da hipótese de que estes preparados poden estimular os mecanismos naturais de defensa das plantas, favorecendo a súa capacidade de resposta fronte aos axentes causantes das enfermidades.
As plantas non producen anticorpos como os animais, senón que dispoñen de mecanismos propios de defensa e de respostas inducidas que poden preparalas para afrontar futuras agresións. Entre eles destacamos o "Priming defensivo": que é un estado de preparación que permite á planta responder con maior rapidez ou intensidade ante unha agresión posterior, e a "Resistencia inducida",frecuentemente relacionada coa acción de microorganismos beneficiosos.
A posible activación destes mecanismos mediante nosodes agrohomeopáticos constitúe unha das cuestións que pretendemos investigar.
COMO TRABALLAMOS?
Para a indución da resistencia vexetal e preparación defensiva (priming) mediante nosodes agrohomeopáticos, a Fundación desenvolve unha metodoloxía experimental baseada nas seguintes etapas:
1. Identificación da enfermidade
Identificamos a enfermidade que afecta ao cultivo, estudamos os seus síntomas, a súa evolución e os factores que favorecen a súa aparición.
2. Elaboración do nosode
A partir de material asociado á enfermidade, elaboramos un preparado agrohomeopático mediante procesos de dilución e dinamización, seguindo protocolos documentados e baixo condicións de seguridade e control.
3. Deseño dos ensaios de campo
Para comprobar a eficacia dos preparados, establecemos ensaios con plantas ou parcelas comparables, sometidas ás mesmas condicións de cultivo, solo, clima e manexo.
4. Aplicación e seguimento
Aplicamos os preparados segundo os protocolos establecidos e realizamos un seguimento periódico da evolución dos cultivos.
Rexistramos a aparición e intensidade dos síntomas, o desenvolvemento das plantas e, cando corresponde, os resultados produtivos.
5. Avaliación e comprobación dos resultados
Comparamos os datos dos diferentes grupos experimentais para determinar se existen diferenzas significativas na incidencia ou gravidade da enfermidade.
A repetición dos ensaios en distintas condicións permite avaliar a consistencia dos resultados e coñecer mellor as posibilidades e limitacións dos preparados agrohomeopáticos.
O noso principio é claro: investigar, observar, comparar e comprobar antes de recomendar.
REDE DE FINCAS EXPERIMENTAIS DE AGROHOMEOPATÍA
A Fundación Galicia Verde promove a creación dunha rede de fincas experimentais de agrohomeopatía, coa colaboración voluntaria de agricultores, gandeiros, asociacións e outras persoas interesadas.
Esta rede permitirá desenvolver experiencias en diferentes cultivos e comarcas, contrastar os resultados e coñecer como poden influír as condicións ambientais e de manexo na resposta das plantas.
Cada experiencia documentarase mediante un protocolo común que recolla a especie cultivada, a enfermidade estudada, o preparado empregado, as condicións do ensaio e os resultados obtidos nos diferentes grupos de control.
A información recompilada permitirá crear progresivamente unha base de datos de experiencias, facilitar a reprodución dos ensaios e promover a colaboración con investigadores e centros especializados.
Queremos que cada experiencia contribúa a ampliar o coñecemento colectivo e que os resultados poidan ser contrastados e aproveitados pola xente do rural.
UN COMPROMISO COA INVESTIGACIÓN E CO RURAL
A Fundación Galicia Verde aposta por explorar alternativas que permitan mellorar a saúde dos cultivos, eliminar a dependencia dos produtos fitosanitarios químicos de síntese e avanzar cara a sistemas agrícolas máis autónomos e respectuosos cos ecosistemas.
QUERES COLABORAR OU PARTICIPAR?
Se tes unha explotación agrícola, unha finca ou un proxecto colectivo e estás interesado en coñecer a agrohomeopatía ou colaborar nas experiencias da Fundación, ponte en contacto connosco.
Informarémoste das liñas de investigación, das posibilidades de participación e das condicións necesarias para desenvolver os ensaios.
SOLICITA INFORMACIÓN
SOLICITUDE DE AGROHOMEOPATÍA
Fundación Galicia Verde
Se observaches unha enfermidade nos teus cultivos ou estás interesado en participar nos traballos de investigación agrohomeopática da Fundación, completa este cuestionario.
A información permitirános coñecer as características da enfermidade, as condicións do cultivo e as posibilidades de desenvolver un ensaio experimental.
A solicitude de información é gratuíta e non implica ningún compromiso económico.
* Campos obrigatorios.